Sexta-feira, 28 de Janeiro de 2011

Wolff, nes momento é ta viva na Portugal, mas é ta fazi hip hop cv…

nu bem kinchel midjor...

 

discrevi bu pessoa...(qualidades, defeitos, gostos, fala u maximo...)

R:

Descreve nha pessoa... nta atxa midjor alguêm descrevem de ki me mesmo descreve nha pessoa. Só si mperguntado algo más especifico pam responde, e sobre qualidade e defeito acho k é midjor alguêm aponta...

 

Cumesso? (quando, pamodi,)

R:

Especificamente nka sabi quando, más há já alguns anos, nconxe um produtor "Djony" que dja produze sons pa artistas como G.N, Nicolau etc, ntom é pom ta  canta la na se stúdio, más era tudo na freestyle, ncurti kel sensaçom, e ncomeça ta screve letras (ntinha uns 11 ou 12 anos), anos más tarde más concretamente na  2006, nha granda brother Kanony convidam pa nu bai grava um som(era mi el e Delcio), nu bai nu fasi som e quase um ano dipos que nbem obi kel som.. nha  reaçom foi credo, nunca más nka ta canta, más staba orrivel mesmo, mas ligaçom dja staba forte di + nca consigue largal más, ntxiga de da um tempo pam obi rap midjor e depos nvolta cu más força e más consciente de cuze kin sa fazeba... nfica ta fazi som ku Kanony e depos ku  As.p e Devil-K, más nca ta xintiba mutu  avontade, nca ta fazeba cuzé kin creba, ti ki mbem panha King street e la nfica nta fasi som sima nta cre mesmo, e nxinte más avontade. nu caba pa fase um mixtape más nu ca txiga de lançal, pmd quase tudo som dja tinha xtriliado pa tudo zona, más mesmo assi nfica contente e satisfeito pmd reasom de público foi espetáculo, ta canta tudo nos letra(maravilha mesmo)....

 

Na altura bu tevi dificuldades?

R:

Dificuldade. sempre. Talves é kel amor pa es stilo de musica ki ca daxano desiste, pmd sima nu sabi na nos terra oportunidade é pocu e desigual, e na Tarrafal ntom nca meste fla. Nu ka tinha um lugar certo de fasi som, material de gravaçom, e txeu senas no ta faseba mesmo de improviso,

 

modi ki surgi wolff? kal ké bu nomi verdadeiro?

R:

Nha nome mesmo é "Eurico Lobo Sousa" má nconxedo más pa Wolff ou Nito.

Wolff, ta deriva de nha apelido Lobo, e foi na secundário que nhas colegas começa ta txoman e fica de vez.

 

fala di king street?

R:

KS, nka tem palavra pam descreve, foi la k nprojeta más, la rapaz dam más espaço pa nfase senas sima nta cre e sempre és dam kel mural

 

É dificel sigui pa frente, pmd?

R:

Difícil é, pmd ami é studante e sons nta faze sempre que ntiver kel tempinho (que nes momento sta escásso), e txeu vez bu ca ta odja resultado de bu trabadjo más,  condições ca tem oportunidade tb não, más nsta li pam bai te und ki da pa bai...

 

Kem ki apoiou nes caminhu?

R:

Em primero lugar tudo maltas de King street, rapaz de Bad Boys, Black-B, T.j,  e otos rapaz que nu ta faze som djunto

 

Kuse ki bu ta atxa di hip hop tarrafal em relaçao a h.h. notus parti di cv?

R:

Na Tarrafal no tem grandas melodia e um stilo de rap diferente de otus lugares, mas tb tem txeu cuza ki nu tem ki muda, nu ca podi dexa ser lebado pa influencia e  nu canta cuzas inconscietemente, nu tem k sabe serto cuze ki nu sa fala e nu tem ki tem cuidado na transmitil. Por outro lado nsa curti tb txeu kes novos rappers ki sa surge, cu temas diferentes e é kela ki nu meste....

 

bu atxa ma é kapaz di alimenta nes ramo moda lado la… ou nhos ta continua ta fazel pa ´´disporto´´?

R:

-Nta acredita ma é capaz de alimenta nes ramo li sim, mas sima nflaba anteriormente oportunidade é desigual e más escásso na nós país..

 

Lágrimas&suor? (ixplika, pmd, kusé ki sta por detras, satisfeito, dipos é kusé...)

R:

Lágrimas&suor é um album ki dja npensaba na fazel há algum tempo más fazeba antes pmd inda ka staba mi de agrado, n´decide obi más, e dipos de txeu reflesson  nconsigue projeta o que ncria. Txeu alguêm ta flaba mi, man devia lançal antes e ma txeus colegas ki começa mutu depos de mi dja lança, más não n´átxa man tral na momento serto e de forma ki ncria. E sobre tema (Lágrimas) ndal kel tema la pmd na el ndesabafa kel ki nta xinte e ntinha dento mi prezo kel ki ca staba mi de  agrado, stórias ki ca dexam contente e cusas ki ten ki muda e (Suor) pa simboliza nha esforço "na rema contra maré", na fase possivel e impossivel pam ntenta muda alguêm mentalidade sobre rap e tenta pos más consciente sobre o que és ta obi, e tb sobre esforço ki nten stado ta fase na nha vida em geral...

(Sobre letras) ami nta cre passa kel hip hop consciente pa kenha ki ta obi rap e mi é a favor de kela, pmd txeu bés nu sa ta obi musicas ki ca ta fla nada, só fla ma teni fama dinhero, ma é más forte, em fim cusas sem sentido, (canta só pa canta). Más hip hop surgiba cu um missom, ki éra da vóz a ques que ca ta obida, kes oprimido, kes rejeitado, e hoje na txeu paíz és ta denominal pa "cultura negra", e es ta despresano ca véz más pmd letras ki és ta obi actualmente. Kel hip hop de essência sta ta desaparece de palco actual, e mi é kela ki nsa tenta trazi ...

(Lançamento) staba previsto pam lançal na 04 de Dezembro de 2010, más por motivos de força maior ca foi possivel e ncaba pa lançal na 25 de mesmo mês e hoje nsta stremamente satisfeito, só na primero semana quase 300 download e hoje depos de um mês de se lançamento teni más de 500 download, e nta aproveita desde já pan agradece tudo alguêm ki tem stado ta apoiam e ta obim... Lágrimas&suor sa ser bem aceite, feedback stremamente positivo.

(Depos) Nteni em mente otus projetos más pra já nca ta adianta nada e nta spera te k é ganha forma mesmo nta adianta más senas. ok

 

kuse ki nos governos tem ki fazi?

R:

Na nha opinion nta átxa mes deve abri jovens más porta, da más oportunidade dento de paíz, pa que jovens ca ten ki bai pa stranjero pa consigue kel ki dento terra nu tem pleno condiçom pa nu consigue, e aposta más na jovens....

 

fala de purtugal(dificuldades, vantagens, danu novidades, fala di tudo aspecto possivel, (scola, musica, vida...)...)

R:

Li na tuga, sima nes momento sta dificil de consilia scola cu muzica, tempo é escásso, e obrigaçom é txeu, más sobre vantagens é ta danu um vison más amplo de cuzas, e ta ponu compara de nós e kel ki nu átxa li, cuzé ki sta mal e cuze ki nu tem ki muda, é kela ki ta poi brota na bó um identidade um defniçom de cuzé ki bu cré. Novidades, sima dja nflaba nteni otus projetos para além de kel mixtape li, teni participaçom na albuns de otus rappers ki sta pa sai inda, e tema de nha próximo mixtape ki nca sabe nem quando é pode sai inda, pmd ncré fazel cu calma e tranquilidade.

 

kusé ki bu ta pensa pa futuro de hip hop… ki concedju bu ta da pa kes ki sa labanta ?

R:

Hip hop é sa universalisa, é sa torna sem raíz e sa bem ser de musica más obido na mundo é o que nta pensa pa futuro,,, e pa kes ki sa surge novo nta pide só pes tem consciencia na cuzé ki és sa fazi, pes ca preocupa txeu cu reconhecimento, más sim cu kel kes tem pes mostra e pes passa..

 

Ki mensagens nu pod atxa na bus musicas y undi bu ta buska inspirason?

R:

Na nhas musicas nhos ta átxa um pocu sobre tudo, nta bai desde nos antepassados até cuzé ki nta átxa ma ta bem contice na futuro, nos dia dia, critica e soluçom pa kel ki n´átxa ma ca sta dreto etc... nha inspiraçom, nta átxa ma é tudo kel ki djam obi e djan presencia ao longo de nha vida....

 

futuro?

R:

Pa futuro djan refire na questões acima, ki é kel projeto, tema de nha proximo album e alguns participaçons....

 

artistas ki bu ta admira?(fora y dento)

R:

Artistas ki más nta admira e ki nta atxa ma ta influência txeu na kel kin ta faze, fora:(Luck Dube, Nina Simone, Ice Cube, Nas, Krazye Bone, Azagaya,Valete,Chullage,Sabotage), e de paíz(Ildo Lobo, Sara Tavares,Mário Lucio,Tulipa Negra, Princesito), na rap dento Tarrafal nta curti txeu trabadjo de Kanony e Devil-K



publicado por Anilton Levy às 16:47 | link do post | comentar

mais sobre mim
Outubro 2020
Dom
Seg
Ter
Qua
Qui
Sex
Sab

1
2
3

4
5
6
7
8
9
10

11
12
13
14
15
16
17

18
20
21
22
23
24

25
26
27
28
29
30
31


pa nhos

Deixa a tua opinião, crítica, perguntas, sugestão, em fim,

diga o que pensas

És de tarrafal também podes ter o teu trabalho aqui…

basta enviares o teu trabalho que será publicado.

ajbooss@hotmail.com



posts recentes

palcoprincipal

Actualiza

wolf- entrevista

wolff légrimas&suor

entrevista shima

g.n_entrevista

fat boy_entrevista

marito_entrevista

downlod

GHETTO NEE_TRABADJU DENTU...

arquivos

Outubro 2020

Agosto 2011

Janeiro 2011

Dezembro 2010

Novembro 2010

Outubro 2010

blogs SAPO
subscrever feeds